۱آگاه بوْلینگلر، یخشی ایشلرینگیزنی آدملرنینگ آلدیده اوزینگیزنی کورسهتیش اوچون قیلمهنگلر. عکسی حالده، آسماندهگی آتهنگیزنی آلدیده مکافاتینگیز بولمهیدی. ۲صدقه بیرهدیگهنینگیزده ایککی یوزلیلردهک جار اورمنگلر. اولر انسانلردن مختهییش آلیش اوچون کنیسهده و کوچهلرده شوندی قیلهدیلر. سیزلرگه توغریسینی اَیتهی : اولر مکافاتلرینینگ همّهسینی آلگنلر. ۳سیز صدقه بیرهیاتکنینگیزده، راست قوْلینگیزنینگ نیمه قیلهیاتگنینی چپ قوْلینگیز بیلمهسین. ۴صدقهنگیز یاشرینچی بوْلسین. اوْشهنده یاشرینچی قیلگن ایشینگیزنی کورهیاتکن آتهنگیزسیزگه مکافات بیرهدی.
۵دعا قیلگهنینگیزده، ایککی یوزلیلرگه اوْخشهمهنگلر. اولر اوْزلرینی مردمگه کوْرسهتیش اوچون کنیسهلرده و کوْچهلرنینگ کنجیده توریب دعا قیلیشنی یخشی کوْرهدیلر. سیزلرگه توغریسینی اَیتهی : اولر مکافاتلرینینگ همّهسینی آلگنلر. ۶سیز دعا قیلهیاتکنینگیزده اویینگیزگه کیریب، ایشیگنی قمهنگ، کورینمهگن آتهنگیزگه* دعا قیلینگ، اوْشهنده یاشرینچی قیلگن ایشینگیزنی کورهیاتکن آتهنگیزسیزگه مکافات بیرهدی. ۷دعا قیلهیاتکنینگیزده، بتپرستلردهی، بیهوده سوْزلرنی تکرار قیلمنگلر. اولر، کوْپ اَیتسم، دعام قبول بوْلهدی، دیب اوْیلهیدیلر. ۸اولرگه اوْخشهمهنگلر، چونکی آتهنگیز* احتیاجلرینگیزنی اوندن تیلهمهسدن آلدین بیلهدی.
۹سیزلر شوندی دعا قیلینگلر : ”ای بیزنینگ آسماندهگی آتهمیز! سیننینگ نامینگ مقدس بوْلسین.
۱۰سیننینگ پادشاهلیگینگ کیلسین.
سیننینگ ارادهنگ آسمانده انجام بوْلگنیدهک ییرده هم انجام بوْلسین.
۱۱بو گونگی رزقیمیزنی بیرگین.
۱۲بیز قرضدارلریمیزنی کیچیرگهنیمیزدِهک، بیزنینگ قرضلریمیزنی کیچیر،
۱۳بیزنی وسوسهگه تشلهمه،
و بیزنی شریردن نجات بیرگین.*
۱۴اگر سیزلر مردمنینگ گناهلرینی کیچیرسنگیزلر، آسماندهگی آتهنگیز هم سیزنی کیچیرهدی. ۱۵اگر سیزلر باشقهلرنینگ گناهلرینی کیچیرمهسنگیزلر، آتهنگیز هم سیزنی کیچیرمهیدی.
۱۶روْزه توتهیاتکنینگیزده، ایککی یوزلیلرگه اوْخشهب قواغینگیز توشمهسین. اولر روْزهدار بولگنلرینی باشقهلرگه کوْرسهتیش اوچون یوزلرینی بیحال قیلهدیلر*. سیزلرگه توغریسینی اَیتهی : اولر مکافاتلرینی آلگنلر. ۱۷سیزلر، روْزه توتگنلرینگیزده یوزلرینگیزنی یووب، ساچلرینگیزگه یاغ سورتینگلر ۱۸تا که توتکن روْزهنگیز باشقهلرگه عیان بولمهسین، بلکه کورینمهگن آتهنگیزگه عیان بوْلسین. اوْشهنده یاشرینچی قیلگن ایشینگیزنی کورهیاتکن آتهنگیز سیزگه مکافات بیرهدی.
۱۹بو دنیاده خزانه جمع قیلمهنگلر. بو دنیا شوندی بیر جای که کویه یییهدی، زنگ باسهدی، اوْغریلر تونل قازیب اوْغیللهیدی ۲۰لیکن خزانهنگیزنی آسمانده جمع قیلینگلر. او ییرده کویه ییمهیدی و زنگ باسمهیدی، اوغریلرهم تونل قازیب اوغیللهمهیدی. ۲۱چونکی خزانهنگیز قییرده بوْلسه، یورهگینگیز هم اوْشه ییرده بوْلهدی.
۲۲کوز بدننینگ چراغی. اگر کوْزینگیز سالم بوْلسه، بوتون بدننینگیز نور بیلن تولگن بولهدی. ۲۳اما کوْزینگیز یامان بوْلسه، بوتون بدنینگیز قرانلیک بیلن توْلگن بولهدی. اگر ایچینگیزدهگی نور قرانلیک بوْلسه، جوده هم کتته بیر قرانلیکده قالگن بولهسیز!
۲۴هیچ کیم ایککی خوْجهیینگه خدمت قیلالمهیدی. یا بیرینی یامان کوْریب، باشقهسینی یخشی کوْرهدی، یاکه بیریگه یاردم بیرهدیگن بوْلیب، باشقهسینی حقیر کورهدی. سیزلر، هم خداگه هم ثروتگه خدمت قیله آلمهیسیزلر.
۲۵شونینگ اوچون سیزلرگه اَیتهمن : حیاتینگیز اوچون تشویش قیلمنگلر، نیمه ییهمیز، نیمه ایچهمیز، اوستیمیزگه نیمه کیییهمیز، دیب تشویش قیلمنگلر. اخیر، حیات اوقاتدن، تنه ایسه کیییمدن مهمراغ ایمهسمی؟! ۲۶آسماندهگی قوشلرگه قرهنگلر. اولر نه ایکهدی، نه اوْرهدی، نه گدامگه ذخیره قیلهدی، آسماندهگی آتهنگیز اولرنینگ رزقینی بیرهدی. آیا سیزلر قوشلردن جوده کوپ با ارزش ایمس سیزلرمی؟ ۲۷سیزلردن بیری تشویش بیلن عمرینی بیر لحظه* اوزهیتیره آلهمی؟! ۲۸نیمه اوچون کیییم حقیده تشویشلهنهسیزلر؟ تشقریدهگی نیلوفر گوللرنینگ قندهی اوْسیشیگه قرهنگلر. اولر نه محنت قیلهدی، نه ایپ ییگرهدی. ۲۹سیزلرگه اَیتهمن، حتّی سلیمان* هم اوشهنچه شان شهرتی بیلن، اوْشه گوللرنینگ بیرانتهسیدهک کیینمهگن. ۳۰بوگون بار، ایرتهگه اوْچاغگه تشلهنهدیگن صحرا اوْتینی خدا شوندی کیدیرهدیگن بوْلسه، ای ایمانی ضعیفلر، سیزلرنی اولردن به مراتب یخشی کیدیرمهیمی؟!
۳۱شونینگ اوچون، تشویش قیلمنگلر، نیمه ییهمیز، نیمه ایچهمیز، نیمه کیییمیز، دیب اَیتمهنگلر. ۳۲بتپرست خلقلر بو نِرسهلرنینگ تشویشیدهلر، لیکن آسماندهگی آتهنگیز بولرنینگ همّهسیگه محتاج بولگهنینگیزنی بیلهدی. ۳۳سیزلر اوّل، خدانینگ پادشاهلیگینی و اونینگ عدالتینی آخترینگ، اوْشهنده بولرنی همّهسی سیزگه بیریلههدی. ۳۴ایرتهنینگ تشویشینی قیلمنگلر، چونکی ایرتهنینگ اوْز تشویشی بار، بو گوننیگ قیینتچیلیکلری بوگون اوچون ییتهدی.