۱یهوه خدانینگ، یرتگن برچه حیوانلری آرهسیده ایلان اِن کوپ عیار ایدی. ایلان خاتینگه اَیتدی : ”حقیقتاً هم خدا، باغدهگی بیرانته درختنینگ میوهسیدن ییمهنگلر، دیب اَیتیمی؟“
۲خاتین ایلانگه : ”یوْق، بیز باغدهگی همّه درختلرنینگ میوهسیدن یییهمیز. ۳لیکن خدا، ”باغنینگ اوْرتهسیدهگی درختنینگ میوهسیدن ییمهنگلر هم قوْل اورمهنگلر، عکسِی حالده، اوْلهسیزلر“ دیب اَیتگن.
۴ایلان خاتینگه : ”یوْق، هرگز اوْلمهیسیزلر“ دیدی. ۵چونکی خدا بیلهدی که، سیزلر بو میوهدن یِیسنگیز، کوْزلرینگیز آچیلهدی، سیزلر هم خدادهک یخشیلیکنی و یامانلیکنی بیلهدیگن بوْلهسیزلر.
۶خاتین قرهگهنیده، اوْشه درختنینگ میوهسینی مزهلیک و کوْزگه چیرایلیک بولگهنینی کوردی، علمینی کوپیتیریش اوچون یورهگی خواهلهیدی. کیین اوْشه درختنینگ میوهسیدن آلیب ییدی. یانیده بوْلگن ایریگه هم بیردی و ایری هم ییدی. ۷اوْشه پیتده ایککاوینینگ هم کوْزلری آچیلدی و یلهنغاچ بوْلگنلرینی بیلدیلر. انجیر درختنینگ برگلریدن اوْزلریگه یاپینچیق تیکیب، کییدیلر.
۸کوننینگ سَلقِینلِیگِیده یهوه خدانینگ باغده یوروییش سیسینی ایشیتیب، آدم خاتینی بیلن یهوه خدانینگ حضوریدن باغدهگی درختلرنینگ آرهسیگه یاشیندیلر. ۹لیکن یهوه خدا آدمگه سیسلهنیب : ”قییرده سن“ دیدی. ۱۰آدم : ”مین باغده سیسینگنی ایشیتدیم، یلهنغاچ بوْلگنیم اوچون قوْرقیب یاشیندیم“ دیدی. ۱۱خدا : ”یلهنغاچ بوْلگنینگنی سینگه کیم اَیتدی؟ یاکه مین، ییمهنگلر، دیب امر قیلگن درختنینگ میوهسیدن می ییدینگ؟“ دیدی.
۱۲آدم جواب بیردی : ”اوزینگنینگ، شو مینگه بیرگن خاتینینگ، اوْشه درختنینگ میوهسیدن مینگه بیردی، مین هم ییدیم“.
۱۳اوْشهنده یهوه خدا خاتینگه : ”بو نیمه قیلگنینگ؟“ دیدی. خاتین : ”ایلان مینی الدهتدی و مین میوهدن ییدیم“ دیدی.
۱۴کیین یهوه خدا ایلانگه شوندی دیدی :
”شوندی قیلگهنینگ اوچون
برچه اهلی و وحشی حیوانلر آرهسیده ملعونراغ سین.
عمرینگ بوْیی قارنینگ بیلن سودرهلیب یورهسن و توپراق ییهسن.
۱۵سین بیلن خاتین آرهسیده و سیننینگ نسلینگ بیلن خاتیننینگ نسلی آرهسیده
دشمنلیک قویهمن.
او سیننینگ باشینگنی ایزیب تشلهیدی
و سین اونینگ تاوانیدن چاقهسن“.
۱۶خاتینگه ایسه شوندی دیدی :
”ولادت قیلهدیگهنینگده دردینگنی کوپتن کوپ قیلهمن؛
درد بیلن بالهلرینگنی ولادت قیلهسن.
ایرینگنی آرزوسیده بولهسن،
ایرینگ ایسه سینگه حکم قیلهدی“.
۱۷آدمگه شوندی دیدی :
”خاتینینگنی گپیگه قولاغ سالیب
مین ییمه دیب امر قیلگن درختنینگ میوهسینی ییگهنینگ اوچون
سین تفهیلی٬ ییر لعنتلی بوْلدی؛
بوتون عمرینگ بوْیی مشقت بیلن اوندن نان ییهسن.
۱۸ییر، سنگه تیکانلر و خسلر کوکرتهدی،
صحرانینگ اوتلریدن ییهسن.
۱۹زحمتینگ بیلن نان ییهسن؛ تا توپراقه قهیتیب بارهدیگن پیتینگگهچه که اوزینک اوندن یرهتیلگن سن، توپراق قهیتیب کیلهسن، چونکی سن توپراق سین.»
۲۰خاتین همّه زندهجاتلرنینگ آنهسی بوْلگنی اوچون، آدم اونگه حوا دیب آت بیردی*. ۲۱آدم و اونینگ خاتینی اوچون یهوه خدا حیوان تیریسیدن کیییم توزهتیب، اولرگه کییدیردی.
۲۲کییین یهوه خدا شوندی دیدی : ”حاضر انسان بیزلردن بیریگه اوْخشهگن یخشیلیکنی و یامانلیکنی بیلهدی. ایندی او قوْلینی اوزهتیب، حیات درختینینگ میوهسیدن آلمهسین که میوهنی ییب دایمی یشهدیگن بوْلیب قالمهسین.“ ۲۳شو سببدن یهوه خدا، اونی عدن باغیدن چیقهردی که توپراققه زراعت قیلسین و اوْزی هم توپراقدان یرهتیلگن ایدی. ۲۴او آدمنی هیدهب یوباردی. حیات درختینینگ یولینی قورییش اوچون عدن باغینینگ شرق تامانیگه کروبلرنی* و هر تمانگه ایلهنیب تورهدیگن الویلی قیلیچنی قوْیدی.