۹نوح نسلینینگ تاریخچهسی شوندن عبارت دیر. نوح اوْز زمانیده پرهیزگار و بیعیب بوْلگن بیر کیشی ایدی. نوح خدا بیلن یورهردی. ۱۰نوحنینگ سام، حام، یافِث دیگن اوچ اوْغلی بار ایدی.
۱۱ییر یوزی خدانینگ نظریده فاسد و خشونتدن تولگن ایدی. ۱۲خدا ییر یوزینی فاسد بولگنینی کوْردی چونکه بوتون انسانلر، ییر یوزیده فساد یوللرنی توتکن ایدی. ۱۳کیین خدا نوحگه اَیتدی : ”ییر یوزیدهگی همّه انسانلرنی نابود قیلمهاقچینمن، چونکی ییر یوزی، انسانلر تفهیلی خشونتدن تولیب کیتدی. اِندی اولرنی و بوتون ییریوزینی بیرگه نابود قیلهمن. ۱۴گوفر* چوبیدن اوزینگه بیر کشتی حاضر قیلیب ایچیده حجرهلر توزتگین. ایچینی و تشقریسینی قیر قیلگین. ۱۵کشتینینگ اوزونلیگی ۳۰۰ تیرسک*، کینگلیگی ۵۰ تیرسک، بلندلیگی ۳۰ تیرسک بوْلسین. ۱۶کشتینینگ اوستیدن بیر تیرسک اندازسیده کیلکین آچ. کشتینینگ ایشیگینی یان تامانیدن آچ. کشتینی اوچ طبقهلی قیلیب توزهتگین. ۱۷مین ییر یوزیگه سو طوفانی کیتیریب، آسماننینگ آستیده و بوتون نفس آلهدیگن هر زندهجاتنی نابود قیلهمن. ییر یوزیدهگی همّه نِرسهلر اولهدی. ۱۸لیکن سین بیلن عهد-پیمانیمنی پایدار قیلهمن، سین کشتینینگ ایچیگه کیرهسن، سین بیلن بیرگه اوْغیللرینگ، خاتینینگ، کیلینلرینگ هم کیرهدی. ۱۹بوتون حیوانلرنینگ هر بیر تورینینگ ایرکهک و اورغاچیسیدن بیر جفت کشتینینگ ایچیگه اوْزینگ بیلن آلیب کیرهسن، تاکه اولرنی اوزینگ بیلن بیرگه تیریک سقلهیسن. ۲۰قوشلرنینگ هر توریدن، اهلی حیوانلرنینگ هر توریدن، سودرهلیب یورووچی جانورلرنینگ هر توریدن بیر جفتی سینی یانینگه کیلهدی تا که اولرنی تیریک سقلهگین. ۲۱اوْزینگ بیلن هر تور آزوقه و ییلهدیگننی آلیپ، یغگین که سینگه و اولرگه خوراکه بوْلسین.“ ۲۲کیین نوح اوْشهندی قیلدی. خدانینگ بویورگن همّه نِرسهنی ییریگه کیتیردی.
۱اوشنده یهوه نوحگه اَیتدی : ”سین بوتون عایله اعضالرینگ بیلن کشتینینگ ایچیگه کیرینگلر. چونکی شو زمانهده مینینگ نظریمده صالح بوْلگن کیشی سینی کوْردیم. ۲اوْزینگ بیلن حلال حیوانلرنینگ اورغاچی و ایرکهگیدن ییتتی جفت، حرام حیوانلرنینگ اورغاچی و ایرکهگیدن بیر جفت آل. ۳قوشلرنینگ هر بیر توری ایرکهگی و اورغاچیسیدن هم ییتتی جفت آل، تاکه بوتون ییر یوزیده اولرنینگ نسلینی سقلهب قویگین. ۴ییتتی کوندن کییین، ییر یوزیگه قیرق کیچه و قیرق کوندوز یاغمور یاغدیرهمن. اوْزیم یرهتگن هر بیر زندهجاتنی ییر یوزیدن نابود قیلهمن.“ ۵نوح یهوهنینگ بویورگن همّه نِرسهسینی ییریگه کیتیردی.
۶ییر یوزینی سوو طوفانی باسکهنیده، نوح ۶۰۰ یاشده ایدی. ۷نوح بیلن بیرگه خاتینی، اوْغیللری، کیلینلری طوفاندن آمان قالیشی اوچون کشتینینگ ایچیگه کیردیلر. ۸–۹حلال و حرام حیوانلردن، قوشلردن، ییرده سودرهلیب یورووچی جانورلردن، هر بیرینینگ ایرکهک و اورغاچیسی جفت جفت بوْلیب خدانینگ نوحگه بیرگن فرمانیدهگیدهی نوحنینگ یانیگه کشتیگه کیردیلر. ۱۰ییتتی کوندن کییین ییر یوزیگه سوو طوفانی کیلدی.
۱۱نوح ۶۰۰ یاشگه کیرگنده، ایککینچی آینینگ اوْن ییتتینچی کونی ییر آستیدهگی سوو چشمهلری فواران قیلیب تاشتی. آسماننینگ پنچرهلری آچیلدی. ۱۲قیرق کیچه و قیرق کوندوز یاغمور یاغدی. ۱۳عینی اوْشه کونی نوح بیلن بیرگه اونینگ اوْغیللری سام، خام و یافِث، خاتینی و اوچ کیلینی کشتینینگ ایچیگه کیردیلر. ۱۴اولر بیلن بیرگه وحشی حیوانلرنینگ تورلری، اهلی حیوانلرنینگ تورلری، ییرده سودرهلیب یورووچی همّه جانورلرنینگ تورلری، قوشلر و قَنَتِی بوْلیب اوچهدیگن همّهسینینگ تورلری کشتیگه کیردی. ۱۵ایککیته ایککیته بوْلیب نفس آلهدیگن هر زندهجات، نوحنینگ یانینگه کشتیگه کیردی. ۱۶یهوهنینگ نوحگه امر قیلگهنیدهی، همّه جانورلرنینگ ایرکهک و اورغاچیسی کشتیگه کیردی. کیین خدا ایشیگنی قَمهدی.
۱۷ییر یوزیده قیرق کون سوو طوفانی دوام اَیتدی، سوو ییرده کوپ بوْلیب، کشتینی ییردن یوقاریگه کوْتهردی. ۱۸سوو ییر اوستیده کوپتن کوپ کوپهییب کیتهوردی. کشتی سوو یوزیده حرکت قیلیشگه باشلهدی. ۱۹سوو ییر یوزیده شونچهلیک کوپ بوْلدی که بوتون آسمانینگ آستیده بوْلگن بلند تاغلر هم کوْمیلیب کیتدی. ۲۰سوو تاغلردن اوْن بیش تیرسک بلندراق کوْتهریلیب تاغلرنی کُمْدِی. ۲۱بوتون ییر یوزیده حرکت قیلهدیگن زندهجاتلر، قوشلر، اهلی، وحشی حیوانلر، سودرهلیب یورووچی جانورلر، بوتون زندهجاتلر و همّه انسانلر نابود بوْلدی. ۲۲قوروق ییرده بوْلگن و یشهب تورگن نفس آلهدیگن همّه زندهجات نابود بوْلدی. ۲۳ییر یوزیدهگی هر قندهی زندهجاتنی، انسانلرنی، اهلی حیوانلرنی، سودرهلیب یورووچی جانورلرنی، آسماندهگی قوشلرنی همّهسینی ییر یوزیدن نابود قیلدی. فقط نوح و او بیلن بیرگه کشتیده بوْلگنلر تیریک قالدیلر. ۲۴سوو ۱۵۰ کون ییر یوزینی یاپیب تورگن ایدی.
۱لیکن خدا نوحنی و او بیلن کشتیده بوْلگن برچه اهلی و وحشی جاندارلرنی اونِتمَهگن ایدی. خدا ییر یوزیده شمال یوباردی و سوو آهسته آهسته کمَیدی. ۲ییر آستیدهگی چشمهلر، آسماننینگ پنجرهلری قمهلدی. آسماندن یاغمور توختهدی. ۳سوو آهسته و آهسته ییر یوزیدن قیتتی. ۱۵۰ کوندن کییین سوو کم بوْلگن ایدی. ۴ییتتینچی آینینگ اوْن ییتتینچی کونی کشتی آرارات تاغلریده توختهدی. ۵اوْنینچی آیگهچه سوو کمهییب کیتهوردی. اوْنینچی آینینگ بیرینچی کونی تاغلرنینگ تپپهسی کوریندی.
۶قیرق کوندن سوْنگ نوح کشتی اوچون توزهتگن کیلکیننی آچتی. ۷قرغهنی چیقهریب یوباردی. ییر یوزیدهگی سوو قوریگنیچه قرغه او یاقدن بو یاققه اوچیب یورهردی. ۸کیین نوح ییر یوزیدهگی سوونینگ٬ ییرینینگ چیکیب آلگهنینی بیلیش اوچون کشتیدن بیر کبوترنی اوچیریب یوباردی. ۹لیکن بوتون ییر یوزینی سوو باسیب یاتگنی اوچون کبوتر قوْنگنی جای تاپالمهی، کشتیگه نوحنینگ یانیگه قیتیب کیلدی. نوح قولینی اوزهتیب کبوترنی توتتی، اوْز آلدیگه کشتیگه آلیب کیلدی. ۱۰نوح ییتتی کون صبر قیلدی. کییین ینه کبوترنی کشتیدن قویبهریب یوباردی. ۱۱آقشم وقتی کبوتر اونینگ یانیگه قیتیب کیلدی. کبوترنینگ نولیده ینگی اوْسیب چیققن زیتون برگی بار ایدی. کیین نوح بیلدیکه، ییر یوزیدهگی سوو کمهییبتی. ۱۲نوح ینه ییتتی کون صبر قیلدی، کیین کبوترنی اوچیریب یوباردی. کبوتر نوحنینگ یانیگه باشقه قیتیب کیلمهدی.
۱۳نوح ۶۰۱ یاشگه کیرگنده، بیرینچی آینینگ بیرینچی کونیده* ییر یوزیدن سوو قوریدی. نوح کشتینینگ قهپقاغینی آچیب قرهدی و ییر یوزی حاضر قوریگن. ۱۴ایککینچی آینینگ ییگیرمه ییتتینچی کونی* ییر قوریگن ایدی. ۱۵اوشنده خدا نوحگه شوندی دیدی : ۱۶”کشتیدن تشقهریگه کیل، اوزینگ، اوزینگ بیلن بوْلگن خاتینینگ، اوْغیللرینگ، کیلینلرینگ. ۱۷اوْزینگ بیلن بیرگه بوْلگن همّه جاندارلرنی و هر تورلی قوشلرنی، اهلی حیوانلرنی، سودرهلیب یورووچی جانورلرنی، اوزینگ بیلن آلیب چیق، تاکه اولر ییر یوزیده یاییلیب سیرپوشت بوْلیب، کوْپهیسین“ ۱۸کیین نوح اوْغیللری، خاتینی و کیلینلری بیلن تشقهریگه چیقدی. ۱۹همّه حیوانلر، سودرهلیب یورووچی جانورلر، قوشلر و ییرده یشهیدیگن همّه جاندارلر، اوْز هم جنسلری بیلن کشتیدن چیقدی.
۲۰اوشنده نوح یهوهگه قربانگاه توزهتدی. سوْنگ بوتون حلال حیوانلردن و حلال قوشلردن آلیب، قربانگاه اوستیده کویدیریلهدیگن قربانلیک قیلدی. ۲۱یخشی ایس یهوهنینگ حضوریگه باردی. یهوه یورهگیده اَیتدی : ”هرگز انسان تفهیلی ییرنی لعنتلهمهیمن هر چند انساننینگ نیتی و یورگی بالهلیگیدن یرهمس. مین بوندن بویان همّه جاندارلرنی هلاک قیلگهنیمدهی هرگز هلاک قیلمهیمن. ۲۲بو عالم بوْلگن مدتیچه، کشت و زراعت، ساووق و ایسسیق، قش و یاز، کیچه و کوندوز بولهدی و بولر توختهمهیدی.“
۱خدا نوح بیلن اونینگ اوْغیللریگه برکت بیریب، اولرگه دیدی : ”سیرپوشت بوْلیب کوپهیینگلر، ییر یوزینی توْلدیرینگلر. ۲ییر یوزیدهگی همّه حیوانلر، آسماندهگی همّه قوشلر، ییرده سودرهلیب یورووچی جانورلرنینگ همّهسی، بحردهگی همّه بلیقلر سیزلردن قوْرقیب، اورکهدیگن بوْلهدی. بولرنینگ همّهسی سیزلرنینگ قوللریزگه تسلیم بیریلدی. ۳حرکت قیلهدیگن همّه جانلیلر، خوراکلرینگیز بولهدی. اوْتنی و سبزجاتلرنی یییشینگیز اوچون بیرگهنیمدهی، حاضر همّه نِرسهنی سیزلرگه بخشیش قیلهمن. ۴لیکن گوْشتنی قانی بیلن که اونینگ حیاتی دور ییمهیسیزلر. ۵سیزنی قانینگیزنی تاوانینی که جانی بار اونده محقق آلهمن. هر تورلی جانوردن بوْلسه تاوانینی آلهمن. انسان جانینینگ تاوانینی انسانیگ قولیدن هم بوْلسه آلهمن.
۶”هر کیم که انسان قانینی توْکسه،
اونینگ قانی هم انسان قولیدن توکیلهدی.
چونکی خدا انساننی اوْز صورتیده یرتگن.
۸خدا نوح بیلن اونینگ اوْغیللریگه ینه اَیتدی : ۹”مین ایندی سیزلر بیلن و سیزدن کیین بالهلرینگیز بیلن عهد-پیمانیمنی پایدار قیلهمن. ۱۰سیزلر بیلن کشتیدن چیققن همّه جاندارلر بیلن، قوشلر بیلن، اهلی حیوانلر بیلن، ییر یوزیده یشهگن همّه جاندارلر بیلن هم عهد-پیمانیمنی پایدار قیلهمن. ۱۱سیزلر بیلن عهد-پیمانیمنی پایدار قیلهمن که همّه جاندارلر طوفان سوویی بیلن هلاک بولمهسین، بوندن سونگره همّه ییریوزینی ویران قیلهدیگن هرگز بیر طوفان بولمهسین“. ۱۲خدا اَیتدی : ”اوْزیم بیلن سیزلر آرهسیدهگی و سیزلر بیلن بوْلگن همّه جاندارلر و کیلهجَکتهگی همّه نسللر اوچون بیرگن عهد و پیمانیمنینگ نشانهسی شو بوْلهدی : ۱۳مین بولوتلر آرهسیده اوْز رنگین کمانیمنی قویدیم و او مین بیلن ییر آرهسیدهگی عهد و پیمانیمنینگ نشانهسی بوْلهدی. ۱۴مین بولوتلرنی ییر اوستیگه یایگنیمده، رنگین کمان بولوتلرده کوْرینهدی. ۱۵اوْشهنده مین اوْزیم بیلن سیزلر و همّه جاندارلر آرهسیده بیرگن عهد-پیمانیمنی یادیمگه کیلتیرهمن. سوولر موندن کیین هیچ قهچان سیل بولمهیدی که جاندارلرنی هلاک قیلسین. ۱۶رنگین کمان، بولوتلر آرهسیده تورگنیده، مین رنگین کماننی کوْرهمن. دایمی عهد-پیمانیمنی که خدا بیلن ییر یوزیدهگی هر جاندار آرهسیده دور، یادمگه کیلتیرهمن.“