۱خدا موسیگه خطاب قیلیب اَیتدی : ۲”اسرائیل خلقیگه اَیت : اگر بیر کیشی ایستهمهی گناه قیلسه، خدانینگ منع قیلگن عمللردن بیرنی عملگه آشیرسه ۳اگر گناه مسح قیلینگن کاهندن عملگه آشیریلگن بوْلسه و بو آرقهلی خلق گناهکار بوْلگن بوْلسه، عملگه آشیریلگن گناه اوچون بیعیب بیر بوقهنی گناه قربانلیگی صفتیده خداگه تقدیم قیلسین. ۴بوقهنی ملاقات چادرینینگ آغزیگه، خدانینگ حضوریگه کیلتریب و قولینی بوقهنی اوستیگه قوییب خدانینگ حضوریده سویسین. ۵کیین مسح قیلینگن کاهن، بوقهنینگ بیر مقدار قانیدن ملاقات چادیرنینگ ایچیگه آلیب کیرسین. ۶کاهن پنجهسینی قانگه باتیریب قاننینگ بیر مقدارینی ییتتی مرته خدانینگ حضوریده مقدس پردهنینگ تمانیگه سچرهتسین. ۷کیین بیر آز قاننی آلیب خدانینگ حضوریده، خوشبوی و عنبرلی بوْلگن قربانگاهنینگ شاخلریگه که ملاقات چادرینینگ ایچیده دور سورتسین و بوقهنینگ قالگن قانینی قربانلیک کویدیرهدیگن قربانگاهگه که ملاقات چادرینینگ آغزیده دور، توکسین. ۸کاهن گناه قربانلیگی قیلینگن بوقهنینگ همّه یاغلرینی ایریب آلسین. ایچهک چاواقلرینی قپلهب تورگن همّه یاغلرنی، ۹ایککهله بوبرهکنی، بوبرهک اطرافیدهگی یاغلرنی و جیگر و بوبرهکنی اوستدهگی پردهنی ایریب آلسین. ۱۰تینچلیک قربانلیگینینگ یاغلرینی ایریب آلینگهنی دهی ایریب آلسین. کاهن همّه یاغلرنی قربانلیک کویدیریلهدیگن قربانگاه اوستیده کویدیرسین. ۱۱بوقهنینگ تیریینی، گوْشتینی، کلهسینی، آیاقلرینی و ایچهک چاواقلرینی، ۱۲بوقهدن قالگن همّه نِرسهنی، قرارگاهنینگ تشقهریسیدهگی کول توْکیلهدیگن حلال جایگه آلیب باریب، اوْتینلر اوستیده کویدیرسین، یعنی کوللرنینگ اوستیده کویدریلسین.
۱۳اگر بوتون اسرائیل خلقی ایستهمهی خطا قیلسه، بو وضعیت جماعتنینگ کوزیگه کورینمهسه، اولر خدانینگ منع قیلگن عمللردن بیرنی عملگه آشیریب گناهکار بولسهلر. ۱۴اگر قیلگن گناهلری اورگهنیلسه٬ خلق بیر بوقهنی گناه قربانلیگی بوْلیشی اوچون ملاقات چادیری آلدیگه آلیب کیلسینلر. ۱۵خلقنینگ آقساقاللری بوقهنینگ باشیگه قوْللرینی قوْیب، بوقهنی یهوهنینگ حضوریده سوْیسینلر. ۱۶کیین مسح بوْلگن کاهن بوقهنینگ قانیدن بیر مقدار آلیب ملاقات چادیریگه بارسین. ۱۷کاهن پنجهسینی قانگه باتیریب، قاننی ییتتی مرته یهوه حضوریده و پرده تامانیگه سچرهتسین. ۱۸کیین یهوهنینگ حضوریده، ملاقات چادیریدهگی قربانگاهنینگ شاخلریگه که ملاقات چادرینینگ ایچیده دور سورتسین، و بوقهنینگ قالگن قانینی قربانلیک کویدیرهدیگن قربانگاه که ملاقات چادرینینگ آغزیده دور، توکسین. ۱۹کییین کاهن بوقهنینگ همّه یاغلرینی اییریب، قربانگاه اوستیده کویدیرسین. ۲۰بو بوقه اوچون هم، گناه قربانلیگی بوْلگن بوقه اوچون نیمه انجام بیرلگن بولسه، انجام بیرسین، کاهن اولر اوچون کفارهسینی ییریگه کیلتیرهدی و اولرنینگ گناهلری بخشیش بولهدی. ۲۱کیین کاهن بوقهنی قرارگاهدن تشقهریگه چیقهریب کویدیرسین، عینی بیرنیچی بوقهنی کویدیرگنی دهی کویدیرسین. خلقنینگ گناهسی اوچون بولهدیگن قربانلیک بودور.
۲۲اگر خلقنینگ رهبری ایستهمهی گناه قیلسه، یهوه خدانینگ منع قیلگن عمللردن بیرنی عملگه آشیریب گناهکار بوْلسه، ۲۳قیلگن گناهسی اوزیگه بیللی بوْلسه، او بیعیب بیر تکهنی قربانلیک قیلیشی کِرک. ۲۴سوْنگ قوْلینی تکهنینگ باشیگه قوْیب، تکهنی یهوهنینگ حضوریده، کویدیریلهدیگن قربانلیکلر جاییده سوْیسین. بو گناه قربانلیگیدیر. ۲۵کاهن پنجهسینی گناه قربانلیگی قانیگه باتیریب، قربانلیک کویدیریلهدیگن قربانگاه شاخلریگه سورتسین. قاننینگ قالگنینی ایسه قربانگاهنینگ یانیگه توْکسین. ۲۶کیین تکهنینگ یاغینی همّهسینی تینچلیک قربانلیگینینگ یاغینی کویدیرگندهی، قربانگاه اوستیده کویدیرسین. کاهن اونینگ گناهسی اوچون کفارهسینی ییریگه کیلتیرهدی و گناهسی بخشیش بولهدی.
۲۷اگر عادی انسانلردن بیری ایستهمهی گناه قیلسه، یهوه خدانینگ منع قیلگن عمللردن بیرنی عملگه آشیریب گناهکار بوْلسه، ۲۸قیلگن گناهسی اوزیگه بیللی بوْلسه، عملگه آشیرگن گناهسی اوچون او بیعیب بیر ایچکینی قربانلیک صفتیده قربانلیک قیلیشی کِرک. ۲۹او قوْلینی گناه قربانلیگینینگ باشیگه قوْیسین، و اونی کویدیریلهدیگن قربانلیکلر جایده سوْیسین. ۳۰کیین کاهن پنجهسینی قربانلیکنینگ قانیگه باتیریب، قاننی قربانلیک کویدیریلهدیگن قربانگاه شاخلریگه سورتسین. قاننینگ قالگنینی همّهسینی قربانگاهنینگ یانیگه توْکسین. ۳۱تینچلیک قربانلیگینینگ یاغینی اییریب آلینگنی دهی، ایچکینینگ یاغلرینی هم اییریب آلسین. کیین کاهن اونی یهوهگه خوشبویی صفتیده قربانگاه اوستیده کویدیرسین. سوْنگ کاهن اونینگ گناهسی اوچون کفارهسینی ییریگه کیلتیرهدی و گناهسی بخشیش بولهدی.
۳۲اگر قوْزینی گناه قربانلیگی قیلماقچی بوْلسه، بیعیب ماده قوزی آلیب کیلسین. ۳۳او قوْلینی گناه قربانلیگینینگ باشیگه قوْیسین، اونی کویدیریلهدیگن قربانلیکلر جایده سوْیسین. ۳۴کیین کاهن پنجهسینی قربانلیکنینگ قانیگه باتیریب، قاننی قربانلیک کویدیریلهدیگن قربانگاه شاخلریگه سورتسین. قاننینگ قالگنینی همّهسینی قربانگاهنینگ یانیگه توْکسین. ۳۵کاهن همّه یاغلرینی اییریب عینی تینچلیک قربانلیگی اوچون قیلینگن قوْینینگ یاغی قندهی ایریب آلینسه، بو قربانلیکنینگ هم یاغلرینی اییریب آلهدی. کیین همّهسینی قربانگاه اوستیده، یهوهگه الووی بیلن تقدیم بوْلگن قربانلیکلردهک کویدیرسین. سوْنگ کاهن اونینگ عملگه آشیرگن گناهسی اوچون کفارهسینی ییریگه کیلتیرهدی و گناهسی بخشیش بولهدی.